Oranjestad, Aruba – 23 di februari, 2015: E interes pa practica e deporte di baseball ta creciendo na Aruba. Tur dia nos por mira e terenonan di baseball yena cu mucha y hobennan cu ta entrena nan deporte preferi. Mirando e exito di e ultimo añanan specialmente den Little League unda Aruba su hoben peloteronan a briya internacionalmente.

Pa varios aña nos seleccionnan di Little League a logra yega torneonan di nivel mundial den Little, Junior y Senior League manera Williamssport, Taylor y Bangor. Na e ultimo Aruba a logra un titulo mundial den 2010. Baseball ta un deporte hopi gusta y sigur popular na Aruba. E deporte dia pa dia ta creciendo y nos peloteronan ta briya unda cu nan bay, pesey mes Lotto, e loteria di Aruba ta aporta te na unda cu por.

Den e fin di siman tras di lomba un bes mas Aruba Little League a inicia cu su campeonato di baseball Little League cu hopi entusiasmo. Casi tur e ekiponan participante na e campeonato a desfila durante di e Ceremonia di Apertura. Un danki na Lotto, e loteria di Aruba cu ta subsidia e campeonato di Aruba Little League.