Oranjestad, Aruba - 10 di februari, 2015: Diadomingo ultimo, e seleccion di tennis hubenil a regresa Aruba unda nan a caba di competi den e Junior Davis Cup y Junior Fed Cup na El Salvador. Spera pa un multitud grandi di famia, amigo y conocirnan na airport, e hobennan a regresa den forma satisfactorio unda cu e ekipo masculino consisti di e hungadonan Patrick Sydow, Kyle Fränkel y Kevin Yarzagaray a logra e titulo como e campeonnan di e Junior Davis Cup y na mesun momento marcando historia di bira e prome ekipo cu a logra esaki desde Aruba su participacion na 1985.
Den e gran final Aruba ta logra gana e pais di Costa Rica y asina logra e titulo maximo. Notabel ta cu e logro aki a pone e seleccion masculino di tennis di Aruba representa e region di Centro America y Caribe na Merca. Eynan e seleccion masculino di tennis lo mester midi forsa contra di Merca, Canada y Mexico esaki pa un luga di clasificacion pa e gran final di Junior Davis Cup cu lo tuma luga den luna di september na Spaña.
Na mesun momento mester felicita tambe e ekipo femenino di tennis consisti di Evelyanne Kelly, Gina van der Veen y Amaryllis Lee kendenan a duna bon bataya den e Junior Fed Cup.
Un danki sigur na Lotto, e Loteria di Aruba pa medio di Comision di Subsidio cu a subsidia e delegacion di Aruba pa por a competi den e evento internacional di tennis.
