Oranjestad, Aruba - 23 di januari, 2015: En conexion cu celebracion di Dia di Betico, Arubaanse Zwembond lo organisando dos dia competencia pa su atletanan di landamento y landamento sincronisa.
Diabierna anochi , dia 23 di januari pa 7'or di anochi, lo tin e competencia pa landamento, unda atletanan di e clubnan di landamento na Aruba, kendenan lo midi forsa contra di otro den e diferente disciplinanan di landamento. Pa 6 or di atardi lo tin e warming-up event. Lo competi den e categoria nan 6 aña y menos, 7-8 aña, 9-10 aña, 11-12 aña, 13-14 aña, 15- 17 aña y 18 aña y mas. Pa por logra un desaroyo mas rapido posibel di e competencia, landadonan bou 10 aña lo landa hunto y esunnan di mas cu 10 aña lo wordo agrupa den un categoria.
Na final di e competencia lo calcula e resultadonan a base di e diferente categorianan. Tambe pa prome biaha lo tin un competencia di Mixed Relays ( 2 mucha homber y 2 mucha muhe ) den tur categoria. Por ultimo, landadonan cu no a logra clasifica pa e competencia di Carifta lo tin e posibilidad di haci esaki e dia di competencia.
Pa loke ta e competencia di landamento sincronisa esaki lo ta riba Dia di Betico esta 25 januari competencia di figura den categoria 12 aña y menos y 13-15. E competencia lo cuminsa pa 9 di mainta na Savaneta. Ambos competencia lo tuma luga den piscina Olimpico Roly Bisslik na Savaneta.
Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo en conexion cu e celebracion riba Dia di Betico. Tur aña mayoria federacion tin riba nan calendario un evento deportivo rond di e fecha di 25 di januari, celebrando asina e fecha natal di e gran estadistica Arubano.
