Oranjestad, Aruba - 22 di januari, 2015: Diamars 27 di januari venidero, Aruba Table Tennis Association ta organisa e Copa Betico Croes 2015 den Centro Deportivo Betico Croes. Pa 5or di atardi e torneo ta inicia cu tur e mesanan yen di atletanan hungando pa logra e miho pa e dia.

Prome lo wordo hunga den e categorianan di infantil y hubenil esta U10, U14, U18. Pa 7or di anochi lo sigui cu e categoria di B y C-klas y Masters. E entrega di premio lo sigui despues di e final di e torneo. Ta bon pa bisa cu den su tempo, sr. Betico Croes den feliz memoria a practica e deporte di tennis di mesa, hasta den su temporada como studiante na Hulanda. Un bes bek na Aruba, Betico Croes a continua cu e deporte di tennis di mesa na Club Estrella.

Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo en conexion cu e celebracion riba Dia di Betico. Tur aña mayoria federacion tin riba nan calendario un evento deportivo rond di e fecha di 25 di januari, celebrando asina e fecha natal di e gran estadistica Arubano.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.