ORANJESTAD, Aruba – 8 di augustus 2013: Lotto, e loteria di Aruba, pa medio di su donacionnan na Comision di Subsidio pa Deporte ta contribui na e progreso di e deporte en general na Aruba. E fondonan ta wordo uza pa, entre otro, diferente proyecto, curso, entrenamento y sponsorship di campeonatonan, asina cambiando bida di nos atletanan cu oportunidadnan cu ta yuda nan desaroya y progresa den nan ramo di deporte.

Esgrima, of "schermen", ta un deporte clasico y ta concidera un deporte noble cu a transcende siglonan y awendia ta gosa di un status special, incorporando tecnologia y ta den desaroyo continuo. Aunke na paisnan oriental e ta un deporte hopi popular, na Aruba e no ta un deporte mucho conoci, pero e ta creciendo considerablemente entre nos hobennan.

Recientemente a biaha pa Madison, New Jersey cuater atleta di Aruba, kende ta participando na un clinica intensivo di esgrima na Drew University. Pa un periodo di seis dia Tirslain Jansen, Sofia Dorcas, Gillian Ruiz y Jonathen Nisbet ta practicando y siñando diferente aspecto tecnico y tactico di esgrima. Tambe, nan lo realisa algun combate di prueba durante nan training na e campo di entrenamento di Drew University.

Lotto ta orguyoso di por contribui na e desaroyo di deporte, su diversificacion y promove experiencia y expertisio den diferente ramo di deporte, particularmente entre nos hobennan. Esgrima ta un ehempel di un di e deportenan den ful desaroyo y Lotto ta spera cu e clinica aki lo ta un apoyo na fortifica e deporte aki mas ainda.

Lotto, e loteria di Aruba tin 8 diferente wega; Catochi, Big 4, Zodiac, Lotto di Dia, Lotto 5, Mini Mega, Wega di Number Korsou y Raspa y Gana. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su ganadonan y na mes momento inverti den deporte local pa medio di donacionnan na e comision di subsidio.