fbpx
E deporte di ajedrez ta uno cu ta exigi hopi concentracion, strategia y training y e Federacion di Ajedrez tabatin e acostumbrado torneo di ahedrez en conexion di e gran celebracion di nos Himno y Bandera, cu ta carga e nomber di ‘Copa Himno y Bandera 2013’. Esaki a tuma luga riba diasabra, diadomingo y dialuna ultimo den e club di ajedrez mes den Nieuwstraat 11, situa na final di Caya Principal.
 
Debi na e gran interes di nos hendenan, a dicidi pa dividi e torneo aki den 2 grupo: un grupo U-16 pa e hobennan bou di 16 aña y un grupo “Open” pa tur hungado riba 16 aña.  Den e categoria di U-16 tabatin un total di 11 mucha cu a participa y a hunga ajedrez den 5 rond. Como e chief arbitro, tabata Raymundo Dijkhoff, cu sigur no tabatin un trabou facil, ya cu e torneo aki ta conta pa rating y pa punto di FAA.
 
Despues di 5 rond, tabatin un empate pa prome luga, entre 3 participante; Jomar Benschop, Douglas Dorothal y Brian Diaz. Tur 3 hungado a score 4 punto for di 5 partido.  
Jomar a hunga cu e hungadonan cu a score mas punto, pues e tabatin mas punto di resistencia y a logra keda na prome luga. E di dos luga a keda pa Douglas Dorothal y di tres luga a bay pa Brian Diaz. 
 
Den categoria “Open” tabatin un total di 11 persona cu a participa y di e 11 participantenan aki, 6 hoben tabata bou di 20 aña. Na prome luga e hoben, Jasel (Osh) Lopez a logra obtene e titulo y Osh a score 4 punto for di 5 partido. Na di dos luga, tambe tabatin un empate entre Jose (Chelo) Pesqueira y e hobencita, Annelaine Jacobs, unda cu ambos a score 3½ punto for di 5. Tur 3 ganado di grupo “Open”, tin titulo internacional di “Candidate Master” (CM) y Annelaine a haya esun di “Women Candidate Master (WCM) aña pasa durante e ultimo olimpiada. 
 
E torneo aki no tabata posibel sin e ayudo di Comision di Subsidio, den cooperacion cu Lotto, E loteria di Aruba. Un palabra di danki ta bay na tur e instancianan, cu di un manera of otro, tambe ta contribui pa un deporte sano pa nos muchanan y nos adultonan. Alabes Lotto y federacion di Ajedrez kier felicita ainda tur e ganadonan di e 2 gruponan, cu a demostra tremendo wega y a bataya fuerte contra otro pa logra e titulonan maximo y ta sigur cu pa proximo torneo, lo tin hungado cu por logra e score perfecto di 100%, pues 5 for di 5.
 
Lotto, e loteria di Aruba tin shete diferente wega; Catochi, Big 4, Zodiac, Lotto di Dia, Lotto 5, Mini Mega y Wega di Number Korsou. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su ganadonan y na mes momento inverti den deporte local pa medio di donacionnan na e comision di subsidio. 
{gallery}joomgallery/originals/copa_himno_y_bandera_ajedrez_2013_21{/gallery}
DMC Firewall is a Joomla Security extension!