ORANJESTAD, Aruba – 15 di februari 2013: Lotto ta hopi contento di por sostene dos deportista mediante di comision di subsidio, cu lo bay hunga e fascinante wega di dam, na Trinidad & Tobago. Wega di dam ultimamente ta hayando masha acogida mes den nos comunidad y sigur ta un wega cu ta exigi hopi concentracion y strategia. Henry Knepa y Delbert Alexander lo ta e dos deportistanan cu ta representa Aruba individualmente, den e torneo di Pana Merica Draughts Championship. 

 

E campeonato aki ta uno masha conoci y sigur di nivel halto, ya cu  e dos personanan aki lo hunga contra 9 otro pais. Nan lo keda 2 siman y pa dia 3 di maart, nan lo bek na Aruba. Lo tin un total di 18 hungado internacional presente, unda cu lo tin 1 coach y 3 referee presente pa atende e weganan aki. Mario Jansen, presidente di e club di Arowak Dam Club na Aruba, a duna di conoce cu tanto Henry como Delbert a train un luna y mey largo, durante varios ora largo y sigur tabata un training hopi intensivo y duro, pasobra e competencia ta priminti di bira uno hopi duro mes. Di parti di Lotto y henter e club di Arowak Dam Club ta convenci cu nan ta cla y bon prepara pa haci un bon papel pa Aruba y sigur lo tin exito. 

 

Lotto, e loteria di Aruba tin ocho diferente wega; Catochi, Big 4, Zodiac, Lotto di Dia, Lotto 5, Mini Mega y Wega di Number Korsou, como tambe e wega promocional Tic Tac Toe, cu awor a drenta den su ultimo luna. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su ganadonan y na mes momento inverti den deporte local pa medio di donacionnan na e comision di subsidio.