E deporte di Amateur Boxing ta biniendo fuerte bek den comunidad y diasabra a keda demostra cu tin hopi interes pa e sigui engrandece y haya un acogida grandi cerca e hobennan, como tambe e fanaticonan. Diasabra ultimo Lotto di Aruba mediante comision di subsidio a patrocina e prome evento di 2013 di Amateur Boxing na Centro Deportivo Betico Croes, na Santa Cruz, unda cu varios fanatico a bin apoya y disfruta di un anochi di boxeo amateur yena cu reto, accion y corahe. Ya for di 7:30 di anochi e portanan a habri y pa exactamente 8or e prome pelea a tuma luga.

 

Tabatin atleta di Aruba y Corsou, entre nan varios atleta hoben bon prepara pa reta esunnan di Aruba. E peleanan tabata hopi bon, ya cu tur e atletanan a haci nan maximo esfuerso y a demostra bon dominio di boxeo durante e peleanan. Nan entusiasmo ta halto y p’esey mes Amateur Boxing ta contento cu tur cos a cana manera mester ta, demostrando profesionalismo y entusiasmo. E publico a disfruta di e prome anochi di pelea di Amateur Boxing y alabes a mustra interes pa sigui mantene e deporte aki activo y fuerte den nos comunidad., pues keda pendiente pa mas pelea durante 2013.

 

Lotto, e loteria di Aruba tin ocho diferente wega; Catochi, Big 4, Zodiac, Lotto di Dia, Lotto 5, Mini Mega y Wega di Number Korsou, como tambe e wega promocional Tic Tac Toe, cual a wordo extendi pa dos luna mas. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su ganadonan y na mes momento inverti den deporte local pa medio di donacionnan na e comision di subsidio.