E Duathlon di Barquisimeto, Venezuela ta considerablemente grandi y popular y ta conta cu participacion di atletanan di entre otro Merca, Brazil, Chile, Argentina, Colombia y naturalmente Venezuela mes. Danki na e cooperacion di Lotto, Aruba tambe lo tin un atleta competiendo na e Duathlon aki riba diasabra y diadomingo.

Gino Hodge ta wordo describi pa su coach Robert Nicolaas como un di e miho atletanan di Aruba den coremento y ciclismo, kende tambe tin e titulo di campeon nacional di Duathlon ariba su nomber. Duathlon ta un combinacion di 10 km di coremento, 40 km di ciclismo y ta conclui cu 5 km di coremento, cual ta rekeri hopi tecnica, coordinacion y stamina y Gino a demostra recientemente den un competencia na Puerto Rico cu e ta den tremendo condicion.

"Nos ta spera bon resultado den e competencia aki," su coach a bisa, referiendo na e Duathlon na Venezuela. Sr. Nicolaas ta expresa cu e bond ta hopi contento cu e ayudo cu Lotto, e loteria di Aruba, ta brinda nan pa Gino por bay competi den exterior.

E coach ta splica cu ta danki na Lotto su aporte na e Comision di Subsidio, e comision tin e placa disponibel pa inverti den nos atletanan. Esaki ta sigur un estimulo pa hendenan sigui inverti den Lotto, Sr. Nicolas a conclui bisando. Lotto ta desea Gino y su coach Robert hopi exito na Barquisimeto!

Lotto, e loteria di Aruba, cu su weganan popular Lotto 5, Lotto di Dia, Mini Mega, Zodiac, Big 4 y Catochi, Wega di Number Korsou awo tin mas opcion pa hunga y gana premio tambe. Fundacion Lotto pa Deporte ta existi desde 3 di december 1982 y desde algun siman pasa tin un imagen nobo, cla pa sigui crece y cambia bida di su ganadonan. E fundacion a haci un donacion di 1 miyon dollar recientemente na e comision di subsidio di deporte, pa nan por sigui aporta na clubnan deportivo por sigui desaroya.