E jackpot di Mini Mega ta sigui ta un locura total y ta sigui aumenta cu cada sorteo, y actualmente tin 2 miyon florin pa parti cu e Mega Plus. Pa e di dos premio, Lotto a logra haci 2 hungado feliz, unda cu cada un a gana e suma di 13.471 florin. Pues ta un total di 26.942 florin ta wordo parti entre dos. Y ya caba e prome ganado a pasa busca su premio na oficina di Lotto na Paardenbaaistraat 10, cu a resulta den e persona di Paul d.C., cu a cumpra su ticket ganado na Negro Diamante.

Paul a conta cu tur biaha ta hunga e numbernan fiho y un par di tempo pasa, e mesun numbernan ey a cay, pero pa e sorteo di Lotto 5. Pues su speransa a bira mas grandi y a sigui hunga fielmente su numbernan. E numbernan tin un nificacion special pe, ya cu ta trata e fecha di su yiu, su pareha, di dje mes y tambe e fecha cu el a conoce su pareha. Prome cos cu Paul tin riba lista pa haci cu e suma di 13.471 florin, ta pa disfruta di un dushi vakantie den compania di su famia.

E di dos ganado a cumpra su ticket na Wan Tu Lottery na San Nicolaas y te ainda no a pasa buska su check. Si abo a cumpra bo ticket na Wan Tu Lottery, check esaki bon paso abo por ta e ganado di e di dos premio di diamars 7 di Januari.

Lotto, e loteria di Aruba tin 8 diferente wega; Catochi, Big 4, Zodiac, Wega di Number Korsou, Lotto di Dia, Lotto 5, Mini Mega, y Raspa y Gana. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su ganadonan y na mes momento inverti den deporte local pa medio di donacionnan na e comision di subsidio.