Oranjestad, 20 di october, 2015: Recientemente e atleta femenino di ciclismo, Cherley van der Linden a competi den e campeonato di ciclismo di ruta den e region di Caribe yama Caribbean Cycling Championship edicion number diescinco na e isla di Barbados. Mas cu 90 atleta di 20 pais den nos region a competi na e campeonato aki cu a dura dos dia. Riba e prome dia di competencia tabata tin e famoso careda contra holoshi, mientras pa su mañan tabata tin e competencia di ruta.

E competencia a tuma luga na e Bushy Park Road Race Circuit y Festival Village. Den e careda contra holoshi, Cherley mester core riba un distancia di 24km mientras pa su mañan den e careda di ruta, e mester e recori e distancia di 154km. Den pasado e atleta Cherley van der Linden a haci tremendo papel den e caredanan cu e la competi na dje den nos region mientras cu den e Weganan Suramericano Hubenil 2013 na Lima, Peru, e atleta Arubano a logra triunfa cu un medaya di oro pa Aruba den e competencia di careda contra holoshi.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atleta Cherley van der Linden pa e 15 edicion di e Caribbean Cycling Championship na Barbados.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.