ORANJESTAD, Aruba - 19 di october, 2015: Despues cu e delegacion di BMX atende e campo di entrenamento na Tampa como tambe competencia di Gator Nationals Supercross Series na Olsmar, Florida, e atletanan lo tin nan proximo compromiso cu lo ta e Disney Cup Fall Nationals, esaki di 23 pa 25 di october na Orlando, Florida. Mester menciona acerca cu e coredonan Freddy Flanders, Zaithyel y Zyqion Soekandar, Jaymer Carolina y Jamil Figaroa lo permanece algun dia na Oldsmar pa asina keda entrena riba e pista di Supercross Series. Su siguiente siman nan lo sigui pa Orlando pa e competencia di Disney Cup.

Mirando cu tin careda di Challenge lo biaha tambe cu e atletanan cu ta forma parti di e desaroyo nobo di bike cross. Esaki sigur ta un bon momento pa esunnan cu pa prome biaha lo competi na un careda internacional di taya. E deporte di BMX sigur ta den pleno desaroyo unda nos atletanan ta sobresali unda cu nan bay. E mayoria di e coredonan di Aruba ta esunnan mas hoben cu ta participa mei mei di e grandinan den nos region y continente. Asina mes semper a demostra e potencial cu Aruba por ta den e deporte di bicicleta.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di bike cross pa e Disney Cup Fall Nationals na Orlando, Florida.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.