ORANJESTAD, Aruba - 9 di september, 2015: E hoben atleta Chiara Petrocchi, cu alabes ta prospecto grandi den e deporte di taekwondo, lo ta biahando pa e ciudad di Aguascalientes, Mexico, unda proximamente e 2nd Pan American Cadet Kyorugi Championship y 8th Pan American Junior Kyorugi Championship lo tuma luga e dianan 7 pa 13 di september.

E atleta femenino Chiara Petrocci lo competi den e categoria di cadet -44 kg, 12 – 14 aña. E atleta ya tin un experiencia amplio pa loke ta competencianan internacional. Na varios ocasion Petrocchi a competi pa Aruba den diferente torneo. Hunto cu e Chiara lo biaha coach Teofilo Rodriguez y presidente di ARTBO, Guaicaipuro Jimenez.

Mester bisa cu taekwondo ta un di e deportenan cu mas a representa Aruba den exterior y cu resultadonan sigur positivo den competencianan internacional grandi den nos continente y region. Tanto den e Weganan Sur Americano y Centro Americano y del Caribe a logra conkista medayanan di plata y brons. Recientemente e atleta elite di taekwondo John Jairo Maduro na dos ocasion a hera logra medaya pa Aruba durante di e Weganan Panamericano 2015 na Toronto, Canada. Claro tin cu duna credito na e federacion di taekwondo, ARTBO kende ta trahando duro na e progreso di nos atletanan di taekwondo.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atleta Chiara Petrocchi pa e campeonato Panamericano di Taekwondo cu lo wordo tenis na e ciudad di Aguascalientes, Mexico.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.