ORANJESTAD, Aruba - 9 di september, 2015: E tri-atleta Arubano, Renze Postma, tin un calendario di competencia basta ocupa pa loke ta e temporada di triatlon den nos region y continente. E atleta Postma kende tabata tin un resultado formidabel durante di e Weganan Panamericano 2015 luna pasa teni na Toronto , Canada, ta cla pa e siguiente competencia cu lo ta na e ciudad di Chicago, Merca.

E 2015 ITU World Triathlon Grand Final and World Championships lo clausura cu e campeonato mundial di triatlon cu lo wordo teni e dianan 15 pa 19 di September proximo. Mas cu 150 top atleta di triatlon lo competi pa e titulo mundial na Chicago riba e distancia Olimpico, esaki net un aña prome cu e Weganan Olimpico di Rio 2016. E evento di e federacion mundial di triatlon, ITU ta esun di mas grandi na mundo mirando cu un total di 6.500 tri-atleta rond mundo lo participa na e evento den e categorianan di elite, sprint, junior, U-23, Paratriatlon y aquathlon. Durante di cuater dia largo e miho tri-atletanan rond mundo lo lucha pa e titulo maximo di triatlon. Na banda di esaki e evento 2015 ITU World Triathlon Grand Final and World Championships lo wordo televisa den mas cu 160 pais.

Nos tri-atleta Renze Postma sigur ta cla pa e competencia aki. Pa mas cu dos aña, Renze ta entrena y dedica su mes full time na e deporte di triatlon y ta representa Aruba varios biaha den exterior. Su logro durante di e Weganan Panamericano 2015 di Toronto, Canada, ta sigur un di su miho prestacionnan te cu awor aki. Entre e miho 36 atletanan di e henter continente America e atleta Postma a obtene un di 24 luga overall, cual sin duda ta un prestacion di kita sombre.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e tri-atleta Renze Postma pa e 2015 ITU World Triathlon Grand Final and World Championships na Chicago, Merca.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.