Oranjestad, Aruba - 20 di januari, 2015: Despues di a conoce un bon presentacion den e aña deportivo 2014, unda varios atleta di pesa a logra tremendo resultado den competencianan local y internacional, awor nan ta cla pa e prome competencia di aña 2015.

Aruba Amateur Weightlifting Association lo ta organisando e competencia di hisamento di peso cu ta Torneo Copa Betico Croes. Esaki lo bay tuma luga den Compleho Deportivo Frans Figaroa na Noord. Lo wordo competi den e categorianan di senior, junior, hubenil y master. Den e torneo aki tambe lo participa e atletanan Muscle & Lungs Crossfit.

Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo en conexion cu e celebracion riba Dia di Betico. Tur aña mayoria federacion tin riba nan calendario un evento deportivo riba 25 di januari, celebrando asina e fecha natal di e gran estadistica Arubano.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.