Pero e Mini Mega di 5 di october tambe a trece suerte pa un otro hungado, esta Maria Luisa Figaroa, cu a gana e bunita suma di Afl. 24.513,=. Desde cu Bo Skina di Suerte a habri su portanan na Boegoeroei, señora Figaroa ta cumpra e numbernan fiho di dje y di su casa, eynan riba tur diamars y diabierna, pa asina nan liña ta na awa. E numbernan cu a sali diabierna siman pasa , tabata e numbernan vast di señor Figaroa cu su señora a cumpra p’e. Y di e manera aki a toca nan e suerte di gana e di dos premio di e Mini Mega. 

Den e wega di Zodiac, Ramon Weindal y su casa tambe ta hunga nan numbernan vast y dialuna anochi durante sorteo di Lotto na Telearuba pa 9 di anochi, nan numbernan a sali. E numbernan 4044 hunto cu e signo di Sagitario, a resulta den e premio gordo di 125 mil florin. E ticket a wordo cumpra na Ten Ten Lottery na Montaña. Tanto Ramon como su señora a keda masha contento mes y e placa aki lo bay pa nan cas y tambe nan lo haci un donacion na un misa, segun e señora a duna di conoce.