ORANJESTAD, Aruba – 15 di juli, 2016: Recientemente e multi-atleta den e deporte di boxeo como tambe MMA, Evan Nedd a biaha pa Venezuela unda e la busca su clasificacion den boxeo pa e Weganan Olimpico di Rio de Janeiro. Algun dia pasa e federacion di boxeo, Arubox a ricibi e grato noticia di AIBA cu e boxdo Evan Nedd a wordo acepta pa bringa e clasificacion Olimpico.

E competencia lo ta e dianan 3 – 8 di juli proximo na e ciudad di Vargas. E boxdo Nedd a competi den e klase di 91+ y a wordo acompaña pa su enterenador Jeffrey Nedd. Ainda ta fresco den nos memoria cu algun anja atras Evan Nedd a logra gana medaya di brons pa Aruba den e deporte di boxeo esaki den e Weganan Sur Americano teni na Argentina.

Mester bisa cu apesar di un tremendo presentacion e desicion no a cay na fabor di Evan cerca e jueznan. Nan a duna e contrincante di Egypto e pelea gana. Asina ta nifica cu Evan no lo bay e Weganan Olimpico di Rio 2016. Pa e proximo Weganan Olimpico di Tokyo na 2020, Evan lo bay concentra su mes ya for di tempran y trata na logra yega su meta aki cuanter anja.

Un danki sigur na Lotto, e Loteria di Aruba pa medio di Comision di Subsidio cu a subsidia e biaha di Evan Nedd pa asina e por logra su clasificacion Olimpico na Vargas, Venezuela.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.